Bedaioko jaiak 2024

Mikel Lopetegi 'Urra'k irabazi du Bedaioko Larrañeta harri baldarraren txapelketa

Ataria 2024ko ira. 8a, 20:38
Deskargatu Info Ahotsak :

Bedaioko jaien barruan harri txapelketa jokatu da. Jende ugari elkartu da pilotalekuaren bueltan, eta harri jasotzaileek ikuskizuna eskaini dute, handia gainera. Giroa berotzen Lierni Osa eta Olaia Esnaola hasi dira, erakustaldi batekin. Ondoren etorri da Bedaioko harri baldarrarekin egindako txapelketa.

Larrañeta harriak 125 kilo ditu, eta Mikel Lopetegi zen faboritoa, Paulo Azpiazurekin batera. Urrak bere lana bikain egin du, marka izugarria jarriz: 5 minututan 20 jasoaldi. Azpiazuri marka jakinda tokatu zaio lanean hastea, eta hasieratik ez da moldatu harri baldarrera. Nola heldu zalantzak zituen. Denborak une horretan ihes egin dio eta ondoren beranduegi zen 20ra iristeko. Amaieran 14 jasoaldi eta lan bikaina.

Hirugarren posturako lau harri jasotzaile geratu dira 13 jasoaldirekin. Bakoitzaren pisua kontuan hartzen da kasu hauetan. Argalena hirugarren, hau da, Hodei Iruretagoiena; pisuan 98 kilo eman ditu, besteek hortik gora.

Sailkapena

  1. Mikel Lopetegi 'Urra'. 20 jasoaldi
  2. Paulo Azpiazu. 14 jasoaldi.
  3. Hodei Iruretagoiena. 13 jasoaldi.
  4. Imanol Rollo. 13 jasoaldi.
  5. Iraitz Arruti. 13 jasoaldi.
  6. Guzta. 13 jasoaldi.
  7. Jagoba Otaegi. 11 jasoaldi.
  8. Aimar Galarraga. 11 jasoaldi.
Festak Tolosa

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!