Larunbatean, Donostiako Klasikak Tolosako kaleak zeharkatuko ditu. Hain justu, Olarrain, Araba etorbidea, San Frantzisko, Rondilla, Lapurdi plaza eta Belatetik igaroko da, Anoetarako bidea hartuz. Hori dela eta, trafiko etenak egingo dira udalerriko hainbat gunetan, parte hartzaileen eta ikusleen segurtasuna bermatzeko.
Esaterako, Rondilla kalea eta San Frantzisko pasealekua itxita egongo dira 12:00etatik aurrera. Udaltzaingoak herritarrei eta bisitariei probaren ibilbide osoan zehar ibilgailuak ez aparkatzeko eskatu die. Horregatik, ostiralean, 22:00etarako Rondilla kaleko eta San Frantzisko pasealekuko autoak kendu beharko direla jakinarazi dute.
Autobus zerbitzuan ere aldaketak egongo dira eta autobus linea ezberdinen geltokiak Santa Klarara lekualdatuko dira lasterketak iraun bitartean.