Tolosako Udal Liburutegiak udako liburutegia berreskuratu du. Usabal kiroldegian kokatuko da, igerilekuaren alboko eremuan. Dagoeneko martxan dago zerbitzua, irailaren 9ra arte, astegunez, 15:00etatik 19:00etara.
Edonori zuzenduta dago zerbitzua eta askotariko materiala egongo da denen eskura: egunkariak, aldizkariak, komikiak, eleberriak, bidaietako gidaliburuak, sukaldaritzari buruzkoak, haurrentzako jolas-liburuak... Tolosarrei liburutegia hurbiltzea da helburu nagusia, eta, aldi berean, irakurzaletasuna sustatu eta herritarren irakurketa ohiturak bultzatzea, horretarako, liburutegiaren ordutegia eta lekua bera zabalduz.
Emango diren zerbitzuak honakoak dira: kiroldegian bertan liburuak aldizkariak edota egunkariak irakurtzeko mailegua, udako liburutegian dauden liburuak etxera eramateko aukera, Tolosako edozein liburutegitatik hartutako maileguak bertan itzultzeko aukera, marrazkiak egiteko margoak eta papera, mahai-jokoak eta wifia. Liburutegiko txartelak egiteko aukera ere egongo da, eta liburutegiko bazkideek, Tolosako liburutegietako liburuak maileguan eskatzeko aukera izango dute. Hurrengo egunean jasoko dituzte.