Tolosaldea IKT klubak antolatuta, Usabal Kiroldegiko igerilekuan San Joan Saria izango da jokoan, larunbatean, 16:00etatik aurrera. Maiatzean egiten duten lehiaketa izan ohi da, baina aurtengoan atzeratu egin da. Egutegiko proba guztiak egingo dituzte igerilariek, eta sailkapena FINA puntuen arabera izango da.
Federatuta dauden igerilariek parte hartuko dute, eta alebin, infantil, junior zein senior mailakoak ariko dira. Hori bai, sailkapen bakarra izango da. 70 igerilari inguru espero dituzte, eta horietatik 25 inguru Tolosaldea IKT taldekoak izango dira. Gehienbat igerilari gipuzkoarrak ariko dira lehian.