Era berean lankidetza berezia itxi du Kordobako unibertsitatearekin eta artista gonbidatua izango da bertan, irailetik urrira bitarte.
Relatos silentes erakusketan 10 margolan bildu ditu. Gizakia gaia lantzen du bertan eta teknika mistoan egin ditu. Emakumeen erretratu eta irudi anonimoak direla esan du, eta ikusizko narrazioak birsortzen dituztela, figurazioaren eta abstrakzioaren arteko nahasketa moduko baten bidez, pertsonen esentzia eta une iragankorrak atzemanez. «Arpegirik gabeko erretratuak dira, eta horiekin interpretazio desberdinak sortu eta emozio desberdinak eragin nahi ditut», esan du Arresek. «Erretratua esperimentaziorako eta nire adierazpen berezirako eremu emankor bihurtzen da, horrela erretratatutako gizabanakoaren interpretazio zabalagoa eta subjektiboagoa ahalbidetuz. Ikusleak bere esperientziak eta emozioak proiekta ditzake. Eszena biziek ez dute inor bereziki hilezkortu nahi, gizabanakoa oro har baizik. Esperientzia unibertsal bat sortzen saiatzen naiz, edozein ikuslerengan eragina izan dezan», gaineratu du.