Atzo zendu zen Txetxo Gaztañaga diseinatzaile tolosarra, 83 urterekin. Titirijai jaialdiaren sorreran parte hartu zuen, eta berak egina da San Frantzisko ibiltokian zuhaitzetatik zintzilik jartzen den Txantxo pertsonaiaren irudia.
Gainera, jaialdiaren lehen 25 edizioetako kartelen egilea izan zen, eta Tolosako Nazioarteko Abesbatza Lehiaketako 46. edizioko kartela ere berak egin zuen. 2013ko sanjoanetan, berriz, udalak kartel lehiaketa herrikoia berreskuratu zuenean, epaimahaikide izan zen Gaztañaga, Eider Epelde, Nisa Goiburu, Nerea Ugarte, Tomas Hernandez eta Anjel Alonsorekin batera.
2008an, bere artelanak ikusgai jarri zituen, lehen aldiz, Aranburu Jauregian. Urtebetez margotzen aritu ondoren, 70 koadro prestatu zituen erakusketarako. 40 urte betetzean jarri zuen lehen erakusketa Euskadiko Kutxan, eta ondoren, Gure Kaiolan jarri zuen, elkartearen 75. urteurrenean. Hortik iritsi zitzaion Aranburun jartzearen proposamena. «Lehen marrazkilariak ginen honetan lan egiten genuenak, eskuz egiten baikenuen, eta ez ordenagailuarekin orain bezala», adierazi zuen 2008ko otsailaren 27ko Tolosaldeko eta Leitzaldeko Hitzaren 1372. zenbakian erakusketaren inguruan egindako erreportajean.
Gure Kaiola elkarteko bazkidea eta inauterizalea zen Gaztañaga. Inauterietan euskarazko doinuak sartzen lehenetarikoa izan zen, 1973koetan, elkarteko kide gehiagorekin batera, Cabaret karroza egin zutenean. Luis Ceberiok 2022an egindako elkarrizketa honetan azaltzen duen moduan, Estanis Urruzola Uxolak abesti ezagun baten letraren zati bat euskaratuta sortu zuen Inauterik diralako kantua abesten zuten.
Hileta elizkizuna bihar, larunbata, izango da, 17:00etan, Tolosako Andre Maria parrokian.