Felix Urkola (Tolosa, 1970) izango da Bide Azpiegituretako eta Lurralde Estrategiako diputatu berria, Eider Mendoza diputatu nagusiak bihar, osteguna, gauzatuko duen izendapena. Orain arte diputatu nagusiaren kabineteburu zen, eta aurrerantzean Maria Ubarretxenaren lekukoa hartuko du. Ubarretxena Eusko Jaurlaritzako bozeramailea eta Gobernantza, Administrazio Digital eta Autogobernuko sailburua da astelehenetik aurrera.
Urkolak gidatuko duen sailari dagokionez, izena eta funtzioa berritu diote, eta azaldu dutenez, udalekiko eta eskualdeko erakundeekiko harremana hartuko du bere baitan, «eginkizun horiek indartzeko asmoarekin». Arlo berria ez zaio arrotz egingo Urkolari, Plangintzako eta Kudeaketako zuzendaria izan baitzen Bide Azpiegituretako departamentuan 2007-2011 legegintzaldian. Era berean, Gipuzkoako udalekiko eta toki- eta eskualde-erakundeekiko lankidetza arintzeko eta sakontzeko lan egingo duela adierazi dute, «herritarren beharrei erantzun hobea ematea ahalbidetuko duen lurralde-ikuspegiarekin». Udal errealitatea eta udalen funtzionamendua «ondo» ezagutzen ditu tolosarrak, izan ere, Lazkaoko alkate izan zen 1999 eta 2007 artean, eta 2015 eta 2019 artean, eta udalerri bereko zinegotzi 2007 eta 2015 artean. Euskalduna da Urkola, Zuzenbidean lizentziatua EHUn, eta graduondoko diplomatua Herri Administrazioetan (UPV/EHU eta IVAP).