Larunbat honetan, ekainak 1, zabalduko da Usabal kiroldegiko kanpoko igerilekua. Astelehenetik igandera izango da zabalik, 10:00etatik 20:00etara, irailaren 20ra arte.
Horrez gain, udako hilabeteetan kirolari lotutako askotariko jardueren ikastaroetan parte hartzeko aukera izango da kiroldegian, ekainaren 24tik aurrera. 14 urtetik gorako gazte eta helduentzat hamabi jarduera izango dira aukeran, besteak beste, aquafitnes, jumpfit, desafit, padela eta igeriketa. 13 eta 16 urte bitarteko gazteentzat, berriz, lau ikastaro antolatu dituzte: askotariko ekintzak, k-fit, shuffle dance eta cycling. Azkenik, 13 urtez azpiko haurrek bederatzi ikastaroren artean aukeratu ahal izango dute; horien artean daude kirol ludoteka, eskalada, dantza eskola eta futbol kanpusa. Eskaintza hemen dago ikusgai.
Izen emateak eta ikastaroei buruzko informazio osoa Usabalkiroldegia.com webgunean dago ikusgai. Informazio gehiagorako, kiroldegian bertan eskatu daiteke, baita 943 536 400 telefonora deituta.