XX. Roberto Jauregiren Oroimenezko hegats igeriketa txapelketa izan zen jokoan larunbatean Usabal kiroldegian, eta bertan Euskal Herriko, Kataluniako eta Aragoiko infantil eta kadete mailako 180 gaztetxok parte hartu zuten. Infantil mailako Espainiako bi errekor hautsi ziren: Claudia Cid kataluniarrak 52,54ko denborarekin 100 metro ur azpian eta Aragoiko Manuel Cayetanok 50 metro proban bi hegatsekin 22,85 denborarekin. Tafallako taldea, Kataluniako selekzioa eta Aragoiko CADAS taldeak izan ziren indartsuenak.
Tolosako Igarondo Urpekoak taldeko bost igerilarik hartu zuten parte, eta beraientzat lehenen lehiaketa izan zen. «Beraien estreinaldian lan polita egin zuten», esan dute klubetik. Iara Sanabria, Olaia Oriozabal, Izaro Fonbellida eta Garazi Fonbellidak 25 metro apnean eta 50 metro ur gainean igeri egin zuten eta Igor Pradosek 50 metro eta 100 metro ur gaineko probetan.