Lau hilabete beteko dira Tolosako osteopataren aurkako lehen sexu eraso salaketa jarri zenetik. Ordutik, guztira hamar emakumek jarri dute salaketa. Otsailaren 2tik behin-behinean atxilotuta dago osteopata. Egun horretan, epaitegian deklaratu zuten haren aurka salaketa jarritako lau emakumek, eta baita berak ere. Epaileak espetxeratzeko agindua eman zuen, ihes egiteko arriskua zegoela argudiatuta.
Bada, sexu erasoa jasan zuten emakumeek salaketa jartzeko emandako urratsa txalotu dute Tolosaldeko Mugimendu Feministatik; era berean, salaketaren prozesua bizitzen ari direnei babesa azaldu die «sistema judiziala oso gogorra delako». Mugimendu feministaren arabera, «elkartu eta ahalduntze ariketa eredugarria» ari dira egiten.
Baina, txalotzearen ez dela nahikoa diote, eta «hitzetatik ekintzetara» jo behar dela. Horregatik, eta kalera irtetearen «beharra» azpimarratuz, eskualdeko mailako elkarretaratzea egingo dute hurrengo asteartean, hilaren 28an, hain justu lehen salaketa jarri zenetik lau hilabete beteko diren egunean. Elkarretaratzea Tolosako Emakumeon Plazan izango da, 19:00etan . «Guk sinisten dizuegu, zuekin gaude, eta zuekin egongo gara!», esan dute.