Museoen Nazioarteko Eguna da gaur, eta hainbat jarduera antolatu dituzte eskualdeko zenbait herritan. Larraulgo Ekomuseoan bisita gidatuak egin dituzte. Tolosako Topic-en, berriz, egitarau zabala antolatu dute: ate irekien saioak egunean zehar, bisita gidatuak, Fotopic argazki erakusketaren irekiera eta sari banaketa, 'sorkuntza gunea' eta 'koktel zuria'.
Alkizako Ur Mara museoan, berriz, 19:00etan hasiko da jazz kontzertua Ura Duo taldearen eskutik. Bikotea osatzen dute Gonzalo Eninal piano jotzaileak eta Alex Haro saxofoi jotzaileak; eta, bitartean, ikusgai egongo da '7 euskal eskultore' erakusketa: Eider Baile, Luisa Aranburu, Virginia Bosch, Pablo Zuriarrain, Amaia Imaz, Uxue Lasa eta Angel Navas.
