Tolosako Udalak sastrakak garbitzeko lanak egingo ditu herriko hainbat puntutan. Asteazkenetik ostiralera, hau da, hilaren 22tik 24ra egingo dituzte lan horiek, «eremu publikoak garbi mantentzearekin batera, bide segurtasuna hobetzeko».
Asteazkenean, maiatzaren 22an Bentaundiko aparkalekuan, Bentaundi eta Araba etorbidearen arteko bidean eta Artzabaltzako sarreratik egurrezko zubira bitartean (bidegorria) eta Artzabaltzako goiko aldean egingo dituzte lanak.
Ostegunean, maiatzaren 23an, Izaskungo igoeran, Brigadaren ondoko San Esteban aparkalekuan, Industrialdeko ezpondan eta San Estebango azken aparkalekuan egingo dituzte lanak. Azkenik, ostiralean, maiatzaren 24an, Txaramarako bidean eta Zirkua egoten den aparkalekuan egingo dituzte lanak.
Esku-hartze horren harira, Tolosako Udalak aipatutako egunetan ibilgailuak adierazitako guneetan ez aparkatzea eskatu die herritarrei, garbiketa-lanak errazteko. Puntu horiek behar bezala seinaleztatuta egongo dira, eragozpenak saihesteko eta lanak eraginkortasunez eta segurtasunez egin ahal izateko.
Amaiur parkea itxita
Bestalde, datorren ostegunean eta ostiralean, hilaren 23an eta 24an, Amaiur parkeko estalkiaren garbiketa egingo du udalak, eta hori dela eta, parkea itxita egongo da lanak egiten ari diren bitartean.