Goizean, kolorez eta lore usainez bete da Tolosako Trianguloa plaza. Eguraldia lagun, herritar ugari gerturatu da bertan ospatu den Lore eta Landareen Azokara. Orotara, zazpi mintegi eta artisauek parte hartu dute azokan, udaberri sasoiko lore eta landare mota nagusiak eskainiz.
Ondorengoak izan dira azokan parte hartu duten mintegi eta artisauak:
- Ines Flores (Anoeta): hazi, landare, lore eta fruitu deshidratatuetan berezitua.
- Iñigo Azpiazu Moreno (Anoeta): loreetan berezitua.
- Karolina Peños Salinas (Bergara, Gipuzkoa): ukendu sendagarriak, gorputzeko xaboiak eta desodorante naturalak.
- Txomin Bilbao Echevarría (Kortezubi, Bizkaia): lore, zuhaixka eta landare sorta.
- Jose Javier Beaskoetxea (Iurreta, Bizkaia): sasoiko landare eta loreak.
- Guillermo Guillen Monreal (Puiu, Nafarroa): lore eta landare sorta zabala.
- Daniel Larena Santos (Zaragoza, Aragoi): bere landare eta lore bilduma.
Lorategi efimeroa
Azoka berezi honen bueltan egin izan den bezala, aurten ere Gaztelako Atea lore eta landarez atondu du Gureak Berdeak lorezaintza taldeak, lorategi efimero bihurtuz. Banbu landareekin hostotza berdea eta kolore urdineko elementuak uztartu ditu aurtengo proposamenak, zutoin, hesi, loreontzi eta tauletan. Landare hauek, udazkenean landatuko dira Elosegi parkean.
Elkartrukerako aukera, Alondegian
Gaur bertan, bigarren eskuko bizikleten elkartrukerako azoka egin dute Alondegi plazan, Zumardia elkarteak sustatuta. Bertan, bizikleta, patin, patinete, kasko eta bestelako bigarren eskuko materialak trukatu, saldu edo erosi ahal izan dituzte bertaratu direnek. Jasangarritasuna, elkartrukea eta berrerabilpena bultzatzea izan da azokaren helburua.
