Tolobolei klubean mutilen talde bakarra dute, eta lehenengo aldiz irabazi dute Euskadiko Txapelketa. Gipuzkoako ligan hiru talde daude infantil mailan eta kadete mailako beste sei talderekin batera parte hartzen dute ligan. Infantil mailako lehen taldea izan zen Tolobolei eta Gipuzkoako beste talde batekin parte hartu dute Euskadiko Txapelketan. Bizkaitik hiru talde aritu dira lehian eta Arabatik bat txapelketa horretan.
Atzo finalerdia jokatu zuten Toloboleikoek Galdakaoren aurka eta 3-0 irabazi zieten. Ondoren, finala Rekalderen aurka izan zen eta talde tolosarra 3-1 gailendu zen. «Ezusteko izan da txapelketa irabaztea, gonbidatu bezala joan garelako», azaldu du Haritz Arruti entrenatzaileak. «Talde bakarra dugu mutilena klubean eta gustatuko litzaiguke atal hori zabaltzea. Animatzen diegu mutilei zein neskei boleibolean izena ematera».