Giro ederrean eman diote jarraipena atzo hasitako magia asteburuari. Eguraldia lagun zela, magia poteoaz gozatzeko aukera izan dute Tolosako Alde Zaharreko kaleetatik ibili diren herritarrek. Izan ere, 12:00etan hasita gertuko magia egiten aritu dira zenbait mago Tolosako kale nahiz inguruko tabernetan. Adin guztietako herritarrek gozatu dute magoen trikimailuekin, eta umorerik ez da falta izan.
Arratsaldean ere kalera aterako dute magia, eta 18:00etan hasita, Gure Magia Gala izango da ikusgai Gure Zirkuan. Bertan, Euskal Herrian ezagunak diren goi mailako lau mago izango dira: Imanol Ituiño, Gonzalo Albiñana, Tor eta Txoborro. Saioa adin guztietako publikoarentzat izango da.