Maiatza iristearekin batera ospatu ohi da Tolosako azoka berezien egutegiko bigarren hitzordua: haragia protagonista duena, alegia. Maiatzaren 2tik 5era ospatuko da aurten, eta haragi mota ugari ezagutzeko eta dastatzeko aukera izango da.
Aurtengo xehetasunak aurrerago azalduko dituzten arren, bada berrikuntza nagusi bat: Bertako Haragien eta Ekoizleen Azoka egingo da aurten Trianguloan, maiatzaren 4an, larunbatez. Inguruko ekoizleen produktuak ezagutzeko azoka izango da, besteak beste, behiki, zaldiki, txerriki, oilaskoki edota ahatekiak. Horrez gain, Zumarditxikian festa gunea ere izango da, eta food truck postuak izango dira, haragi mota ezberdinekin osatutako jakiak dastatu ahal izateko.
Hain zuzen, bi espazio horietan postuak jartzeko eskaerak egiteko epea zabalik da jada, datorren apirilaren 21a bitarte. Zumarditxikian food truck-a jarri edota Bertako Haragien Azokan parte hartu nahi dutenek aurrez eskaera egin beharko dute Udaten edota telematikoki, udal erregistroaren bitartez. Informazio gehigarria, bete beharreko baldintzak eta eskaera orriak eskuragarri daude udal webgunean.