Ostegunean izan zen Tolofolk jaialdiaren lehen kontzertua eta bihar bitarteko egitaraua prestatu du JeaJeaka kultur elkarteak. Gaur goizean Kalepoza kalejirak hartu ditu Tolosa erdiguneko kaleak eta dultzainero, txistulari eta txaranga doinuak izan dira. Kontzertuak arratsaldean izango dira; 18:30ean Pandereteras de Ruente entzun ahal izango da Plaza Berrian eta 20:00etan leku berean Balkan Paradise Orchestra ariko da. Bihar 19:00etan izango da aurtengo azken kontzertua. Xabier Zeberiok eta Arineketan bikoteak –Iñar Sastre piano-jotzailea eta Jagoba Astiasaran txistularia– itxiko dute jaialdia 19:00etatik aurrera. Laukote formatuan izango dira Plaza Berrian, Alejandro Saul Martinez biolontxelo-jotzailearekin batera.
