Urtarrilaz geroztik herriko Irisgarritasun Plana berrikusi eta eguneratzen ari da Tolosako Udala, eta bi saio ireki ere egin ditu herritarren eta eragileen proposamen zein iritziak jasotzeko. Bigarren saio horretan diagnostikoaren azalpenak eskaini zituzten eta, ondoren bertaratutakoen iritzi eta ekarpenak jaso zituzten. Eta orain, diagnostiko hori herritar ororen esku jarri du Tolosako Udalak interesa duen orok kontsulta dezan. Ekarpenak egiteko aukera ere egongo da, hain zuzen, apirilaren 14a bitarte, gobernantza@tolosa.eus helbidera idatziz edo datorren astetik aurrera UDATEn, horretarako ahalbidetuko den postontzian.
Indarrean dagoen Tolosako Irisgarritasun Planak 20 urte ditu jada eta dokumentua egungo zein etorkizuneko errealitate eta beharretara egokitzeko beharra ikusi du udalak. Horretarako herriko kale eta eraikin publikoen irisgarritasun-maila ebaluatu eta etorkizunean egin beharreko hobekuntzak identifikatzen eta lehenesten ari da, herritarren eta eragileen parte hartzearekin. Irisgarritasun Planaren berrikuspen eta eguneraketa lau esparrutan oinarrituta dago: erabilera publikoko eremuak, garraioa, komunikazioa eta eraikin publikoak.