Datozen asteetarako eskaintza berritu dute Tolosako Topic-en. Batetik, txotxongilo tailerrak egingo dituzte sei urtetik gorako haurrentzat; eta, bestetik, erakusketa berritu dute. Apirilaren 3an, 4an eta 5ean egingo dituzte ikastaroak, 09:30etik 12:30era izango da. Parte hartzeko izena eman behar da 943 650 414 telefono zenbakian edo pedagogia@cittolosa.com helbidean.
Erakusketa berria
Joan den martxoaren 8tik erakusketa berria dute txotxongiloen museoan: Errege makina. Irudi-antzerkiaren bilakaera XI. mendetik XX. mendera. 2005ean ikertzaile talde batek, XVII. mendean ospea izan zuen denbora-pasa bat –Errege makina– berreskuratzea proposatu zuen eta izen hori bera hartu zuen Cuencako (Espainia) euren konpainiak. Horrela, Errege makina konpainiak "Txotxongiloen antzerkiaren 1.000 urte Espainian" erakusketa birsortu du. Bertan, eszenografia batzuk Espainiako txotxongilo historiaren bilakaera islatzen dute. Erakusketa ikusgai egongo da irailaren 15era bitarte.