Guztira, hamar salaketa jarri dituzte Tolosako osteopataren aurka sexu erasoak egotzita. Urtarrilean sei salaketa jarri zituzten haren aurka, otsailean beste bi jarri zituzten eta, hilabete honetan, duela egun batzuk, bigarrena.
Oriako ertzain-etxeko agenteek sexu-eraso baten ustezko egilea delakoan atxilotu zuten osteopata urtarrilaren 21ean. Ondoren, atxilotuaren kontsulta miatu zuten, ikertzen ari diren gertaerekin lotutako ebidentzien bila. Atxilotua eta polizia-eginbideak Tolosako Epaitegiaren esku utzi zituzten, eta epaileak kargupean aske utzi zuen atxilotu eta bi egunera. Salaketen arabera, gertakarien ustezko egileak masaje-saioa hasten zuen bizkarreko, lepoko edo gerrialdeko eremuetan, baina, handik gutxira, gizonaren manipulazioa eremu intimoetara iritsi zen, inolako baimenik gabe.
Otsailaren 2tik atxilotuta dago osteopata. Egun horretan, epaitegian deklaratu zuten haren aurka salaketa jarritako lau emakumek, eta baita berak ere. Ondoren epaileak espetxeratzeko agindua eman zuen, ihes egiteko arriskua zegoela argudiatuta.