Tolosako osteopataren aurka beste hiru salaketa jarri direla-eta, gaur goizean Ertzaintzak atxilotu egin du eta epaitegira eraman. Bertan, lau emakumek deklaratu dute eta atxilotuak ere bai, eta ondoren epaileak espetxeratzeko agindua eman du. Sexu erasoa egotzita, guztira sei salaketa izan direla eta ihes egiteko arriskua dagoela argudio bezala erabilita, hartu du epaileak osteopata behin behinean espetxeratzeko erabakia, Fiskaltzak egindako eskariari bide emanez. Ertzaintzak azaldu duenez, ikerketa zabalik dago salaketa gehiago izan daitezkeelakoan.
Oriako ertzain-etxeko agenteek sexu-eraso baten ustezko egilea delakoan atxilotu zuten osteopata urtarrilaren 21ean. Ondoren, atxilotuaren kontsulta miatu zuten, ikertzen ari diren gertaerekin lotutako ebidentzien bila. Atxilotua eta polizia-eginbideak Tolosako Epaitegiaren esku utzi zituzten, eta epaileak kargupean aske utzi zuen atxilotu eta bi egunera. Salaketen arabera, gertakarien ustezko egileak masaje-saioa hasten zuen bizkarreko, lepoko edo gerrialdeko eremuetan, baina, handik gutxira, gizonaren manipulazioa eremu intimoetara iritsi zen, inolako baimenik gabe.