Samaniego eta Orixe herri ikastetxeek antolatuta XXV. Elkartasun Krosa egin da urte zahar egunez Tolosan. Bildutako diru guztia Zutani elkartearentzat izan da. Edizio berezia izan da aurtengoa Samaniego ikastetxeak 50 urte betetzen dituelako eta krosak berak 25.
Ehunka korrikalarik hartu dute parte gaurko lasterketan. Zerkausia kalean benjaminak eta infantilak atera dira txandaka 15:30etik aurrera eta 16:30ean eman zaio hasiera lasterketa nagusiari. Helduek eta kadeteek Plaza Zaharretik abiatuta 5 kilometro pasatxoko ibilbidea egin dute Zerkausia kalean bukatzeko.
Elkartasun ekimena da Samaniego eta Orixe ikastetxeek antolatzen dutena eta dortsalen salmentatik ateratako dirua aurten Zutani elkarteari emango diote, haien lana babestu eta indartzen jarraitzeko.
Lasterketa amaituta sariak banatu dituzte Zerkausian. Ikastetxe publikoek elkarlanean diseinatutako eta egindako garaikurrak banatu dituzte lehen postuetan sailkatu direnen artean. Zenbait korrikalari mozorrotuta atera da gaurko krosera eta mozorrorik onenari aipamena egin diote antolatzaileek. Gainera, aurten, Iraitz Arrospide lasterkariari aitortza egin diote. Besteak beste, 50 kilometroko munduko txapelduna da Arrospide, eta Behobia-Donostia lasterketan podiumak egindakoa.