Prozesu pausatu baten ondoren, bederatzi kantuz osatutako bakarkako lehen lana kaleratu du Xabier Zeberio artista tolosarrak: Pause. Ibilbidea «oso polita» izan dela dio artistak, «lasai egindakoa, presarik gabe». Aitor Etxebarria ekoizlearen laguntzarekin landu du eta emaitzarekin «oso kontentu» dagoela adierazi du: «Itxura batean sinplea dirudien arren, gauza konplikatua lortu dugu, elementu gutxirekin asko transmititzen duena, autentikoa».
Artista tolosarraren azken lan hau ostegunean entzuteko aukera izango da, 19:00etan, Tolosako Leidor aretoan. Dagoeneko sarrerak salgai daude Kutxabank webgunean edo Leidor aretoko leihatilan.