Buru Bihotzez elkarteak antolatuta, Alzheimerra eta beste dementzia batzuk mahai ingurua izango da bihar, hilaren 5ean, Tolosako kultur etxeko areto nagusian, 18:00etan hasita. Elkartetik azaldu dutenez, Tolosaldeko egoera aztertuko dute. Mahai inguruan Tolosaldeko ESIko, Tolosako Udaleko Gizarte Zerbitzuetako, Inmakulada Lanbide Ikastolako eta Buru Bihotzez Elkarteko kideek hartuko dute parte.
Foro honen helburua gaixotasunaren egoeraren berri ematea dela kontatu dute Buru Bihotzez elkarteko kideek. «Baita gaixoei, haien familiei eta zaintzaileei bizitza hobetzeko eta laguntzak emateko inplikatuta dauden erakundeek eskaintzen dituzten zerbitzuen berri ematea ere». Elkarteko kideek eskualdeko herritar guztiak gonbidatu dituzte bertara.