Gipuzkoako Auzitegiak lau urteko espetxe zigorra ezarri dio gizon bati 13 urteko adingabe bati sexu-erasoa egiteagatik. Espetxe zigorrarekin batera gizonak 10.000 euro eman beharko dio kaltetuari, eta hamar urtez ezingo da harengana hurbildu, ezta harekin komunikatu ere. Halaber, zaintzapeko askatasun-egoeran egon beharko du bederatzi urtez, espetxetik atera ondoren.
Gertakaria 2019ko abuztuaren 16ko goizaldean izan zen, gizona eta haren biktima, adingabea, Donostian zeuden eta ukituak egin zizkion. Ondoren, Donostiatik Tolosara joan ziren, autoan, hirugarren pertsona bat gidatzen ari zela, eta bertan ere ukituak egin zizkion. Behin Tolosara iristerakoan berriz egin zion eraso.