Ogi-Berri Txapelketa Migel Soroa Oroimenezkoaren final-laurdenetako bigarren jardunaldia izango da jokoan gaur arratsaldean, Tolosako Beotibar pilotalekuan. 17:00etan hasiko da jaialdia eta lehen partidan lau pilotari gazte ariko dira, lagunarteko neurketa jokatuz. Murua (Intxurre) eta Goiburu (Lapke) bikotea Iraeta (Tolosa) eta Leonet (Oiarpe) bikotearen aurka ariko da. Murua pasa den astean Gipuzkoako txapelduna izan zen eta Aspe enpresarekin aurrekontratua sinatu du.
Ondoren, elite mailako partida interesgarri bat jokatuko da. Canabal (Oberena) eta Loza (Barberito) bikoa J. Alberdi (Tolosa) eta Uriondo (Lea) bikotearen aurka ariko da. Aipatu Loza errioxarrak Aspe enpresarekin aurrekontratua daukala sinatuta. Irabazleek finalerdietarako txartela lortuko dute.