Usabal kiroldegiko pertsiana erdi irekita dago gaur goizean. Kiroldegiko langileak lanera itzuli dira, atzo egin zuten agerraldian greba amaitutzat jo ondoren. «Batez ere, igerilekua da lan handiena ematen duena», adierazi dute langileek. Hain zuzen, igerilekuak eta jacuzzia hustu dituzte eta horiek garbitzen eta prestatzen ari dira une honetan, berriro bete aurretik. Saunak garbitzen ere lanak izaten ari dira, lizunduta daudelako.
Bestalde, sistema elektrikoa martxan dagoela esan dute eta gimnasioak, bertako makinak nahiz kirol kantxak eta pistak erabilgarri daudela nabarmendu dute. Orain, beraz, enpresak ikusi beharko du zein erabaki hartzen duen; datozen orduetan emango dute hurrengo urratsen berri.