Astebeteko atsedenaren ostean, igandean bueltatuko da Ogi-Berri Txapelketa Migel Soroa Oroimenezkoa. Hain zuzen, laugarren jardunaldia jokatuko dute Beotibar pilotalekuan, 17:00etan hasita. Lehen mailako partidak emango dio hasiera, Lizeaga (Mundarro) - Canseco (Titin) bikoak jokatuko duelarik Arambarri (Azkoitia) eta Telleria (Lapke) gipuzkoarren aurka. Partida oso irekia dago eta ez dago faborito argirik.
Ondoren, elite mailan Elolak (Tolosa) eta Irazustabarrenak (Intxurre) neurtuko dituzte indarrak Olaetxea (Irurtzun) - Alduntzin (Zugarralde) bikote nafarraren aurka. Hori ere oso partida irekia dela azpimarratu dute antolatzaileek. Aipatu Irazustabarrenak, Aizpururen ordez jokatuko duela, azken honek eskuetan duen arazoa tarteko.