Hiru eguneko lanuzteak eta 24 greba egun aurrera eraman eta gero, beste bi greba egun deitu dituzte LAB eta ELA sindikatuek. Urriaren 18rako eta 25erako egin dute deialdia.
«Tolosako Invizako langileek zerbitzu publikoa eskaintzen dugu, beste eskualde batzuetan Osakidetzak egiten duena, baina batzuen eta besteen lan baldintzak oso urrun daude», esan dute langile ordezkariek. 2021etik berritu gabe dute hitzarmena eta urte hauetan eman den KPIa kontuan hartuta, %12,2ko eros ahalmena galdu dute. Hitzarmena berritzearekin, besteak beste, galdutako eros ahalmena berreskuratzea, KPIari erreferentzia egingo dioten soldata igoerak izatea eta 35 orduko lan astea egikaritzea dira lortu nahi dituztenak.
Langile ordezkariek zehaztu dutenez, «klinika kudeatzen duen Inviza enpresa-taldeak, 5,8 milioi euroko etekinak izan ditu azken lau urteetan, erregistroan dauden datuen arabera, baina enpresak orain arte ez du erakutsi negoziatzeko inongo borondaterik».