Orixe BHI eskolako DBH 3 mailako ikasleak Think critically & click wisely izenburupean informazioa eta medioen alfabetatzearen inguruko proiektu bat ari dira burutzen, eta hor kokatzen da Herbereetako Groningen herriko Haren Lyceum eskolako hainbat ikaslerekin egiten ari diren elkartrukea. Atzo iritsi ziren eskualdera eta ostirala bitarte egongo dira bertan. Orixeko ikasleak apirilean joango dira Groningen herrira.
Ataria-ko erredakzioa bisitatzeaz gain, Berria egunkariko erredakzioa ere bisitatuko dute, eta Donostiako Tabakaleran ere hainbat tailerretan parte hartuko dute. Datozen egunetan, inguruko herrietan turismoa egiteko tartea ere izango dute, besteak beste.
Beste hainbat programa martxan
Ikasturte honetan ere Orixe BHI eskolak beste hainbat programa ditu martxan. Horien artean, batetik, Belgikako Sint Aloysius ikastetxearekin elkartrukea egiten ari dira batxilergoko 1. mailako ikasleak. Bertan, garapen jasangarriko 17 helburuetako batzuk landuko dituzte Rainbow Nations proiektuaren baitan. Orixeko ikasleak urriaren 20tik 27a bitartean joango dira bertara, eta belgikarrak, berriz, otsailean izango dira Tolosan.
Bestetik, Orixeko DBH 4. mailako ikasle bat ere Irlandako Glenamaddy eskolan ari da ikasketak burutzen. Hain zuzen, irailak 1ean joan zen eta abendua arte izango da bertan.
Azkenik, bi irakasle urrian Maltara joango dira Artificial Intelligence in Education ikastaroa egitera.