Aurreko egunean, ostiralean, abiatuko da San Sebastian Circuit Spirit delakoa, hau da, auto klasikoen bira. Eta Gipuzkoan barrena ibiliko denez, Tolosan ere izango du bere sartu-irtena. Seigarren edizioan 100 auto klasikotik gora parte hartuko dutela aurreikusi dute antolatzaileek.
Larunbat eguerdian iritsiko dira kotxeak Tolosara, Olarraindik sartuta. San Estebango aparkalekua izango dute geraleku, baina sei auto Plaza Zaharrera eramango dituzte, herritarrek bertatik bertara ikusi ahal izateko.
Parte hartzaileek Ferialekuan bazkalduko dute eta bazkal ondoren birarekin jarraituko dute, Tolosa erdigunea zeharkatuz: San Frantzisko pasealekua, Nafarroa etorbidea, Santa Klara eta Larramendi zubia.