Tolosako Plaza Berriak hondartza itxura hartu du datozen bost egunetarako. XIII. Hondartza Bolei Txapelketa Mistoa jokatzen hasteko eguna dute gaurkoa, eta prest dira lehiari ekiteko 32 talde. Iaz baino zazpi talde gutxiagok hartuko dute parte aurtengoan, Toloboleiek azaldu duenez. Tolosaldeko bolei jokalariak izango dira guztiak eta ez da festarik faltako.
Urteroko moduan, lehia festa bilakatuko da. Arratsalde osoan zehar jokatuko dira partidak, afalostera arte. Larunbat goizean, azken partidak jokatuko dira, eta 15:30etik aurrera final zortzirenak izango dira eta jarraian etorriko dira gainerako partidak, finala jokatu arte.