Aldaba, Alde Zaharra, Alde Zaharra Zaindu, Amarotz auzo elkartea, Bedaio, Berazubi, Iurre, Iurramendi, Iurramendi Hobetzen, Larramendi, Ttontor (San Esteban) eta Otsabik (Izaskun auzoa) osatzen dute Tolosako auzoetako auzo elkarteen plataforma.
Adierazi dutenez, Tolosako Udaleko gobernu talde berriak egindako deialdian izan ziren uztaila erdian: «Bertan, eta hauteskundeetan emandako hitza betez, gobernu taldeak gure hiriko auzo eta eremuetako bizilagunen elkarteekin (tolosarren % 65 baino gehiago ordezkatzen dutenekin) ezarri beharreko interakzio-dinamika berria helarazi zigun. Ilusioz beteriko ekimen hori hasi besterik ez da egin, baina, zalantzarik gabe, erakundearen eta auzo-erakundeen arteko komunikazioa erraztuko du».
Ilusio horrek ardurak ere baditu, ordea: «Elkarteen plataformatik espero dugu entzunak izatea eta horrela, kontuan hartuak izatea ordezkatzen ditugun bizilagunen eguneroko bizitzan eragina duten gaietan. Auzo bakoitzaren kasuistika zehatz eta espezifikoez gain, badira alderdi makroekin lotutako elementu komunak, adierazitako eremuetan bizi diren pertsonen egunerokotasunari eragiten diotenak. Horien artean, honako hauek nabarmentzen dira: garraioa, zerbitzuak eta mantentze- lanak, segurtasuna eta trafikoa, garbiketa, argiztapena, elkarte bakoitzaren jardueren urteko plana finantzatzea, etab».
Gai horiek eta gehiago, elkarlanean aurrera eraman behar direla diote plataformatik: «Gobernu-taldeak eta elkarteek aztertu behar dituzte, Tolosako hirian bizi garen pertsonen beharrei eta ongizateari lehentasuna emateko borondate argiarekin».