Caja Rural-Seguros RGA txirrindulari taldeak gaur jakinarazi duenez, Gorka Sorarrain fitxatu dute. Tolosako txirrindularia Portugalgo BAI-Sicasal taldean zegoen denboraldi honetan, baina hitzarmenari esker, talde nafarraren elastikoa jantziko du gaurtik aurrera.
Aldaketa berehala nabarituko du Sorarrainek. Izan ere, orain arte, bere ingeniaritza lana eta txirrindularitza uztartzen zituen. Hemendik aurrera, ordea, %100 txirrindulari profesionala izango da, Caja Rural-Seguros RGAtik azaldu dutenez. Talde berriarekin korrituko duen lehen lasterketa Portugalgo Itzulia izango da, abuztuaren 9an hasi eta 20an bukatuko dena. Guztira 10 etapa egin beharko dituzte.