Beste urte batez, Tolosako Udalak, kultur eragile gehiagoren laguntzarekin, Kultura Plazara egitasmoa antolatu du udan zehar, hainbat kontzertuz osaturiko egitarauarekin.
Egitarauaren berri datorren astean emango duten arren, udalak autobus zerbitzu berezia eskainiko du egitasmo honen barruan landa guneetan egingo diren kontzertu eta ikuskizunetara joateko.
Horren harira, uztailaren 8an, larunbata, Mirua taldeak kontzertua egingo du Bedaion eta bertara joan eta itzultzeko autobus zerbitzua eskainiko da herrigunetik.
Kontzertua 19:00etan hasiko da eta autobusa 18:00etan irtengo da San Frantzisko elizaren pareko geralekutik eta itzulera ekitaldia amaitu ostean izango da.
Zerbitzua doakoa izango bada ere, interesdunek aurrez eserlekua erreserbatu beharko dute, uztailaren 6a baino lehen, kultura@tolosa.eus helbidera idatziz eta izen-abizenak, eserleku kopurua eta harremanetarako telefono bat zehaztuz.