Joan den martxoan esan bezala, dagoeneko hasi dira herriko eskulturak zaharberritu eta garbitzeko lanak. Izan ere, urteen poderioz, eta egoera klimatologiko eta bestelakoen ondorioz herriko eskulturak narriatu egin dira eta horien balorea aintzat hartuta, guztien egoera ona mantendu eta iraunkortasuna bermatze aldera, Tolosako jarduneko udalak herriko eskulturak zaharberritu eta garbitzeko lanei ekin die.
Eskulturen garbiketa eta zaharberritzea eskulturagintzan adituak diren pertsonek egingo dituzte eta faseka garatuko dira. Lehen fase honetan, esaterako, Juan Loperen Baserritarrei omenaldia, Koldobika Jauregiren Kantu ixila IX eta Eduardo Txillidaren Lizardiren leihoa eskulturak ari dira zaharberritzen. Lehena Lizardi plazan dago kokatuta, Koldobika Jauregirena, halaber, Zabalarreta parkean dagoen harrizko pieza da eta Eduardo Txiillidaren eskultura Aranburu Jauregiaren aurrean dagoena da.
Egingo diren esku-hartzeen bitartez, eskulturetan urteen poderioz jasandako narriadurak garbitu eta obren jatorrizko itxura berreskuratuko dira. Horretarako eskuz kenduko dira zikinkeria, zementu-hondarrak, gorotzak, likenak edota pintura-hondarrak, eskulturen harria eta materiala hondatzen ez dituen material eta produktuekin.
Zaharberritze lanek bi hilabete inguruko iraupena izango dute, betiere baldintza klimatologiko egokiekin eta erabilitako materialak behar bezala lehortzeko denborak errespetatuz.