Anayurd elkartea aritu da topaketaren antolakuntzan, Berazubi Auzo Elkartearekin batera. Topaketan jakiak dastatzeko zein hainbat herrialdetako artisautza erosteko aukera dago. Horrez gain, bigarren eskuko azoka ere jarri da.
Anayurd elkarteak jatorri atzerritarreko biztanleek dituzten zailtasunak eta eskubide urraketen berri emateko ere probestu du topaketa. Postuetako batean dago Ana Belen Arias Martinez kolonbiarra. 15 urte daramatza Euskal Herrian, eta bere jatorriko herrialdean enpresa administraritzako ikasketak egin eta alor horretan lan egin arren, hemen garbiketa alorrean eta adinekoen eta haurren zaintzan lan egin behar izan du. «Hasiera batean, hona iristen zarenean, asko arbuiatzen gaituzte, atzerritarrak izate hutsagatik. Hasieran asko sufritzen da, eta gero zerbait hobetzen joaten da», azaldu du Ariasek.
Bestalde, Berazubi Kultur Astearen barruan, gaur 21:00etan afaria izango da Goya hanburgesekin.