Kontsumitzailearen bulegoak azaldu du herritarrak hipoteka maileguko kontratu bat sinatu zuela 2015ean, eta, orduan, hipoteka eratzearekin lotutako ia gastu guztiak ordaindu behar izan zituela. 2021ean Auzitegi Gorenak horri buruz emandako hainbat erabakiren ondoren, bankuak idazki bat bidali zion hipoteka gastuei buruzko 5. klausularen deuseztasuna jakinarazteko. "Kontsumitzaileak Tolosaldeko KIUBean beharrezko informazioa bildu ondoren, erreklamazio formala egin zion bankuari, eta honek ukatu egin zion zenbateko horiek itzultzea, erreklamatzeko epea igaro zela argudiatuz. Bankuak ezezkoa eman ondoren, eta Tolosaldeko KIUBak gomendatuta, azken horrek adierazitako aholku eta jarraibideei jarraitzeaz gain, kontsumitzaileak hitzezko judizioko demanda bat aurkeztu zuen epaitegian".
Tolosaldeko kontsumitzaileen bulegoak gehitu du kasu hauetan, zenbatekoa 2.000 euro baino gutxiagokoa denean, ez dela beharrezkoa kontsumitzailea abokatuak eta prokuradoreak lagunduta joatea. Auzitegiak kontsumitzailearen eskaera izapidetzea onartu zuen eta bankuak alegazioa aurkeztu zuen, baina epaitegiak ez du onartu. "Beraz, epaitegiak kontsumitzailearen aldeko epaia eman du, eta kontsumitzaileak 1.000 euro baino gehiago berreskuratu ditu bidegabeki kobratutako hipoteka gastu batzuen kontzeptupean, inolako gastu gehigarririk egin gabe".