Agifes elkartearen Zinema eta Buru Osasuna zineforum ziklo ezagunak formatu ibiltaria izango du aurten. Saio bana eskainiko du elkarteak Gipuzkoako zenbait udalerritan, herritar gehiagorengana iristeko nahiarekin. Egitasmoaren helburua da buru osasuneko arazoen ezagutza zabaltzea, baita buru nahasmendua duten pertsonen gizarteratzea sustatzea ere.
Lehenengo saioa maiatzaren 16an izango da, 18:30ean, Tolosako Leidor aretoan, Palabras en las paredes del baño filmarekin. Eskizofrenia paranoidea duen nerabe baten istorioa kontatzen du drama estatubatuar honek. Izan ere, sendagai esperimental batekin duen tratamendu berriak institutuan nahiz institututik kanpo bizimodu normala izateko aukera emango diola espero du.
Sarrera doakoa da, baina gonbidapenak aldez aurretik jaso beharko dira zinemako leihatilan, gaurtik aurrera. Filmaren ondoren, solasaldia egingo dute, filmaren mezuan sakontzeko.