Berez, Trianguloa plazan egin behar zuten, baina osasungintzari lotutako manifestazioa zela eta, lekuz aldatu eta San Frantzisko ibiltokian jarri dituzte zazpi postuak. Horietako bakoitzean, gai jakin baten inguruan elkarteekin eta adituekin hitz egiteko aukera izan dute herritarrek: suizidioa, antsietatea, depresioa, bipolaritatea, adikzioak, elikadura nahasmenduak eta eskizofrenia. 11:00etatik 13:00etara gauzatu dute egitasmoa eta 12:00etan Olaia Toral musikariak kontzertu akustikoa eskaini du.
Ekitaldiak Impact Day ideia lehiaketan du sorrera. Laura de la Iglesiak, Nahia Zumetak eta Nahia Apeztegiak, Tolosako Inmakulada Lanbide Ikastolako ikasleak zirela, bertako Berpiztu Osasun Mentaleko Batzarrean ezagutu zuten elkar. Irakasle batzuek esan zieten lehiaketa horretara aurkezteko, osasun mentalari buruzkoa zelako. Impact Day lehiaketan aditu batzuen zenbait azalpen jaso ondoren, denbora tarte bat izan zuten proiektu bat pentsatzeko eta aurkezteko. Lehen sailkatuak izan ziren, eta proiektua Gipuzkoako Foru Aldundiaren Gazteak Auzolanean programara aurkezteko gonbita jaso zuten segidan. Hain justu, programa horretatik jasotako diru laguntzarekin antolatu dute Tolosako Safe Place ekitaldia.