Langileek hasiak dituzte jada lanuzteak. Astearte eta ostegunero klinikako kafetegiaren aurrean elkartzen dira hamar minutuz bizi duten egoera salatzeko, eta pasa den asteazkenean, atzo eta gaur, bi orduko lanuzteak egin dituzte, baina beste pauso bat eman eta lanuzteak indartu dituzte. Horiek horrela, maiatzaren 8, 9, 17, 18, 19, 22, 23, 29, 30 eta 31n egun osoko greba egingo dute. Egun horietan elkarretaratzeak egingo dituzte Asuncion aurrean 12:00etan. Mobilizazio horiekin batera, maiatzaren 9, 17, 23 eta 31n kotxe karabanak egitea aurreikusten zuten; orain, egun horietan, 11:00etatik 11:30tara elkarretaratzeak deitu dituzte Tolosako udaletxearen aurrean, eta gero klinikara igoko dira. «Hitzarmen duin baten alde borrokan, herritar guztioi parte hartzera deitzen zaituztegu», adierazi dute langileek.
Asuncion Klinikako (Inviza ospitaleko) langileek zuzendaritzari eskatu zioten jarreraz aldatu eta langileen erosahalmena bermatu eta lan orduak murriztuko dituen hitzarmena negoziatzeko. Oraindik erantzunik jaso gabe jarraitzen dute.