Urtero, 1977tik, maiatzaren 18an Museoen Nazioarteko Eguna ospatzen da mundu osoan; Tolosako Topic-ek ere bat egiten du ospakizunarekin. «Aukera paregabea da museoek gure gizartearen eta kulturaren garapenean duten zereginaz kontzientziatzeko», adierazi dute bertako kideek. Bada, 2023ko Museoen Nazioarteko Eguna dela eta, txotxongiloak eta argazkigintza maite duen oro museoan argazkiak egitera gonbidatu du Topic-ek, Fotopic 2023 argazki lehiaketa antolatu baitu.
Maiatzaren 14ra bitarte, jarduera honetan parte hartu nahi dutenek museoan dohainik sartu ahal izango dute argazkiak egitera. Sarreran identifikatu egin beharko dira, eta azken egun hori baino lehen, egiten dituzten irudien aukeraketa bat bidali beharko dute museo@cittolosa.com helbide elektronikora. Argazkiak Topic.eus webgunean elkarbanatuko dituzte, eta aurkeztutako irudi guztiekin, publikoari irekitako argazki erakusketa bat antolatuko dute maiatzean, Topic-en bertan.
Parte hartzaile guztien artean hiru irabazle egongo dira eta maiatzaren 18an (Museoen Nazioarteko Egunean) egingo dute sari banaketa ekitaldia. Irabazle bakoitzak Topic-eko txotxongilo bat eta Topic-en txotxongilo ikuskizun bat ikusteko 4 sarrera (2023ko urritik 2024ko maiatzera bitartekoak, Titirijai jaialdiko ikuskizunak izan ezik) eskuratuko ditu.