Lehenbiziko aldiz euskal pentatloian bigarren mailan lehiatuko dira, eta zuzenean finala jokatuko da, larunbatean, Tolosan. Saioa 18:00etan hasiko da, zezen plazan, eta hamabi kirolari ariko dira lehian, horietako batzuk herri kiroletan dagoeneko ibilbide oparoa egindakoak eta beste batzuk hasiberriak: Mikel Agirre, Ander Altuna, Jon Alustiza, Joseba Arakama, Gorka Etxeberria, Daniel España, Jon Gisasola, Julen Kañamares, Iñigo Landa, Aratz Mugertza, Xabat Olaizola eta Jagoba Otaegi.
Ondoko lanak egin beharko dituzte kirolariek: 100 kiloko bolari 8 jasoaldi, giza proban plaza bat, aizkoran kanaerdiko bat ebaki, txingekin hiru plaza egin eta korrika kilometro bat. Kirolariak lau txandatan plazaratuko dira eta zozketa egun berean egingo da, 17:00etan.
Sarrerak 20 euro balio du eta Tolosako Kantabriko tabernan daude salgai. Horrez gain, aurten berrikuntza izango da Bizum bidez ere erosteko aukera. Ordainketa 607 44 39 29 zenbakian egin behar da eta kontzeptuan sarrerak + izen abizenak jarri behar dira, eta egunean bertan leihatilan jaso ahalko dira. Bestalde, leihatila ere zabalik egongo da egunean bertan sarrerak erosteko. Larunbateko lehen sei sailkatuek sari berezia izango dute, irailean egingo den lehen mailako Euskal Pentatloi Txapelketan parte hartzeko txartela.