Atzo, apirilak 19, Zuhaitzaren Eguna ospatu zen eta horren harira, urtero legez, zuhaitz landaketa antolatu zuen Tolosako Udalak, Ingurumen Zentroarekin elkarlanean eta herriko ikastetxeen laguntzarekin.
Aurtengo landaketa Herrikide ikastetxeko 5. mailako ikasleekin egin da. Guztira 60 lagun inguru elkartu ziren, irakasleez lagunduta, eta Goroldi enpresako adituen gidaritzapean, Belate auzoko 80 zuhaitzen txorkoetan landare bizidunen eta urteko landareen haziak landatu dituzte, txorko biziak lortuz. «Zuhaitzen txorkoak sarritan zaborrontzi modura edota zigarrokinak botatzeko erabiltzen dira eta landaketa honekin, biziz eta kolorez beteko dira eta zuhaitzentzako mesedegarriak diren intsektuak erakarriko dituzte. Gainera, lorategi txiki hauekin, korridore berdeak sortuko dira, herriko biodibertsitatea areagotuz», adierazi dute udaletik.
Era berean, landaketak helburu du herritarrak oro har eta ikasleak bereziki kontzientziatzea eta sentsibilizatzea, gazteengan biodibertsitatearen aldeko ekintzak sustatuz eta zuhaitz, baso eta berdeguneekiko heziketa eta sentsibilizazioa bultzatuz. Landaketak, gainera, bat egiten du ikastetxeetan lantzen den Eskola Agenda 2030 ingurumen hezkuntza programarekin.