Eguerdiko mokadutxoa eta edana Gure Txokoa elkartearen eskutik etorri dira gaurkoan. Izan ere, bosgarrengoz Gure Ardo Txuri Txokoa antolatu du Tolosako elkarteak. 13 upeltegitako 14 ardo eta cava dastatzeko aukera izan da, eta bereziko eguerdi aldera jendez beteta egon da Trianguloa plazan jarritako karpa.
Jatorri askotako ardoak dastatu ahal izan dira: galiziarrak, gaztelarrak, kataluniarrak, errioxarrak, nafarrak eta gipuzkoarrak. Aurrekoetan bezala, ardoa dastatzeko kopa hartu beharra izan dute herritarrek, eta ondoren, aukeran izan dituzte mota askotakoak. Gainera, ardoarekin batera, askotariko pintxoak ere jarri dituzte, euro baten truke.
Jendea erruz gerturatu da azokara, eta antolatzaileek ardo desberdinen inguruan egindako azalpenak entzuteko aukera izan dute goiz osoan. Izan ere, Gure Txokoa elkartekoek azaldu moduan, azokaren helburua deitura desberdinetako ardo zuriak eta horiek egiten dituzten upategiak ezagutaraztea da.