Sohütako Eperra ikastolarekin eta Maule-Lextarreko Herriko Etxearekin elkarlanean, lehenbiziko aldia izango da euskal zirku ibiltaria Zuberoara iritsiko dena. 2022ko bira «zoragarria eta gogoangarria» izan zela adierazi dute zirkuko kideek, eta hiru hilabetez atseden hartuta, errepidera itzultzeko ordua iritsi zaiela esan dute. «5 urte joan dira jada lehen euskal zirku ibiltariak abentura eder hau hasi zuenetik, eta ordutik, dozenaka izan dira ezagututako herriak eta ehunka eskainitako emanaldiak. Eta 5 urteren ondoren, bide beretik jarraitzeko asmoa dugu; zirkuaren grina lau haizeetara zabalduz, eta bere karpa Euskal Herriko ahalik eta txokorik gehienetara eramanez», gaineratu dute.
Maule-Lextarreko Gorre zelaian izango dira lau emanaldiak:
- Apirilaren 28an, ostiralean, 19:00etan.
- Apirilaren 29an, larunbatean, 16:00etan eta 18:30etan.
- Apirilaren 30ean, igandean, 11:00etan.
Sarrerak jada salgai daude Gurezirkua.eus webgunean.