Animaliak alde batera jo nahi eta gizakiak sokaren laguntzarekin, beste aldera agindu. Gizonezkoak Plaza Zaharrean eta Solana kalean, batzuek zezenari muzin egin nahian eta beste batzuek bere atentzioa deitu nahian.
11:00etan jo ditu Berazubi txarangak lehen doinuak eta zezen ikuskizuna ordubetez luzatu da Astelenita egunean. Ikusleak egurrezko hesiari pega-pega eginda eta zezena gerturatu ahala, koreografia batean bezala pausoek atzera egiten zuten.
Zezenaren adarren aurretik korrika era guztietako mozorroak: ertzainak, dantzariak, ehiztariak... baina atentzioa torero batentzat eta sanferminetarako prest zeudenentzako izan da.
