Berdura plazara bueltatu dira Tolosako Inauterietako doinuak. Bertan, Tolosako Udal Musika Bandak, Udal Txistulari Bandarekin batera pregoi kontzertua eskaini dute. Baina ez dira gaurko protagonista bakarrak izan. Aurten 40 urte betetzen dituen Hodeiertz abesbatzak ere parte hartu du, inauterietako kantuak abestuz.
Jendetza bildu da Berdura Plazan. Gertaratu direnak abesbatzarekin batera aritu dira kantuan, eta ez dira gutxi izan dantzan egitera ausartu direnak. Festa giro aparta sortu da bertan.
Omenaldiak
Sorpresak ere izan dira tartean. Alde batetik, Koldo Tarragona Sukalde elkarteko kideak, elkartearen ereserkia zuzendu du. Izan ere, Sukalde elkarteak 50. urteurrena betetzen du aurten, eta bandak omenaldia egin nahi izan dio.
Baina omenaldi bereziena, 47 urtez bandako kide izan den Mila Garcia de Iturriosperi egin diotena izan da. Gaur aritu da azken aldiz bandako kide gisa, eta emanaldiaren amaieran bandako kideek omenaldia eskaini nahi izan diote. Bandaren eta Tolosako Udalaren eskutik hainbat oroigarri jaso ditu, eta ondoren, bere bi alabek agurra dantzatu diote. Kontzertuko azken kantua, gainera, berak zuzendu du.