Bertakoez gain, inguruko herrietako jende ugari elkartu da goizean Tolosako San Blas auzoan azken festa egunarekin bat eginez. Tolosako Udal Txistulari Bandaren musikarekin jaiki dira auzotarrak, eta Konponezinak txarangak eman dio dianari jarraipena. Ugaitz Mugertza eta Jexux Mari Mujika aizkolarien erakustaldia ikusteko aukera izan da, eta, horren ostean, Oihana Iguaran eta Julio Soto bertsolariak igo dira oholtza gainera.
Arratsaldean ere izango da zer ospatu San Blasen. Bertsolariek bigarren saioa eskainiko dute 18:00etan, eta ondoren, Elustonto anai-arrebek hartuko dute oholtza aurtengo festak agurtuz.