Tolosako Udal Musika Bandak ere inauterietarako prestaketa lanekin dihardu. Bihar bertan hasita, zenbait ekitaldi izango dituzte datozen asteburuetan.
Bihar, igandea, Iurreamendi egoitzaren kanpoaldean egingo dute kontzertua, Tolosako Udal Txistulari Bandarekin batera. Urteroko zita izaten da zaharren egoitzakoa; azken urteetan, pandemiaren ondorioz, ezin izan dute bertan kontzerturik egin, baina aurten bertaratuko dira. Hori bai, egoitzaren kanpoaldean izango da kontzertua, barruan egitea oraindik ezinezkoa delako.
Datorren igandean, hilak 12, Pregoi kontzertua egingo dute Berdura plazan, 12:00etan hasita. Bertan ere Udal Txistulari Bandarekin batera izango dira. Baina ez dira protagonista bakarrak izango. Aurten 40 urte betetzen dituen Hodeiertz abesbatzak ere parte hartuko du, inauterietako kantuak abestuz.
Kontzertu hori azkena izango da bandako kide den Mila Garcia de Iturrosperentzat. 47 urte bete ditu bandan, eta emanaldiaren amaieran omenaldia egingo diote.
Azkenik, inauteri egunetan, ohiko emanaldiak izango ditu bandak: helduen danborrada Zaldunita Bezperan, eta Zaldunita eguneko Diana.